IHRC ta zargi CBN da nuna wariya ga ma’aikatan masu alaka gwamnatin Buhari
Kungiyar kare hakkin Dan adam ta Duniya wato International Human Rights Commission (IHRC), zargi Babban Bankin Najeriya (CBN) da nuna bambanci tsakanin ma’aikata.
Babban Daraktan Kungiyar na Najeriya, Ambasada Abdullahi Bakoji Adamu ne ya sanar da hakan ta cikin wata sanarwa ga manema labarai a Kano.
Ya ce akwai zargi mai karfi dangane da nuna bambanci da rashin adalci a wajen korar ma’aikata sauya masu wurin aiki da CBN ya yi.
“Rahotannin da ake yadawa kan wasu matakan da ake zargin Babban Bankin Najeriya (CBN) ya dauka karkashin shirinsa na sake tsari, sun nuna wasu abubuwa da ake zargin nuna bambanci ne da rashin adalci a wurin aiki, dama take haƙƙoƙin dan Adam da kundin tsarin mulkin Najeriya ya tanadar,” inji shi.
Ambasada Bakoji ya nuna rashin jin dadinsu a kan korar ma’aikata ba bisa ka’ida ba kamar yadda aka samu rahoton an kori ma’aikata sama da 400 da wanda aka tilasta wa ritaya saboda alakarsu da tsohuwar gwamnatin Muhammadu Buhari.
Kungiyar IHRC ta yi zargin tilasta wa ma’aikata sama da 2,300, har da matan aure, zuwa Lagos a yanayin da ya sa wasu dole su yi ajiye aikin baki daya.
An yi zargin ana son amfani da damar wajen tilasta wa ma’aikata sama da 6,000 lamba domin yi musu ritayar dole.
Sanarwar ta shawarci gwamnati ta bi tsari da ka’idar aiki domin gudanar da duk wani sauyi ta yadda za’a bawa kowanne ma’aikaci cikakken hakkin da yake dashi a matsayin sa na dan Najeriya.
IHRC ta zargi CBN da nuna wariya ga ma’aikatan masu alaka gwamnatin Buhari
