Hukumar ‘yan sanda ta sallami manyan jami’ai 19 bisa laifuka daban-daban

Hukumar ‘Yan Sanda ta Kasa, PSC ta sallami manyan jami’ai 19 daga aiki, ciki har da mataimakan sufeto, sufeto na mataimaka, da sufeto mai daraja, bisa laifuka daban-daban da suka hada da sakaci da kin aiwatar da umarni.

Wannan hukunci ya biyo bayan zaman taro na farko da hukumar ta yi a Abuja, inda ta kuma rage mukamin wasu jami’ai 19 tare da yi wa wasu tsawatarwa da ba da wasikar gargadi.

Kakakin hukumar ta PSC, Ikechukwu Ani ne ya bayyana hakan a wata sanarwa a ranar Juma’a.

“Yawancin jami’an da aka kora suma bangaren shari’a na rundunar ‘yan sandan Najeriya ne za su gurfanar da su gaban kuliya. Al’amura uku da ke jiran ladabtarwa sun sauka ne tare da neman karin bayani daga babban sufeton ‘yan sanda.

Ani ya ƙara da cewa, Hukumar ta kuma yi la’akari da ƙorafe-ƙorafe da ƙalubalai guda 23 da kuma al’amuran shari’a/hukuncin kotu guda tara.”

Ani ya bayyana cewa an tattauna batutuwan ladabtarwa guda 110 da ke jiran bita, tare da ƙorafe-ƙorafe da ƙalubalai guda 23, da kuma hukuncin kotu guda 13 da ake buƙatar aiwatarwa a zaman taron.

Shugaban Hukumar, DIG Hashimu Argungu (mai ritaya), ya bayyana cewa daga yanzu, Hukumar za ta hanzarta yanke hukunci kan batutuwan ladabtarwa na ‘yan sanda domin bawa wadanda ba su yi wani laifi ba damar ci gaba da aikinsu, yayin da wadanda aka samu da laifi za su fuskanci hukunci.

Ya kuma gargadi ‘yan sanda da su guji shiga cikin al’amuran farar hula kamar rikicin filaye, matsalolin aure, da takaddamar haya, domin Hukumar ba za ta sassauta wa irin su ba.

Hukumar ‘yan sanda ta sallami manyan jami’ai 19 bisa laifuka daban-daban