Gwamnatin Tarayya zata gudanar da Taron matasa a watan Fabrairu
2 years ago 2 min read
Share:
Gwamnatin tarayya ta tsayar da watan Fabrairu 2025 domin gudanar da babban taron matasa na kasa.
Shugaba Bola Tinubu, a lokacin da yake bayanin ranar samun ‘yancin kai, ya bayyana hada taro na musamman na matasan na tsawon kwanaki 30, domin magance matsalolin da ke addabar matasan kasar nan, wadanda suka hada da rashin aikin yi, ilimi, da shiga harkokin siyasa, kamar yadda kungiyoyin matasa daban-daban a fadin kasar nan.
Taron da aka shirya ya kasance wani bangare na martanin da gwamnatin ta yi kan zanga-zangar da matasa suka yi, wadanda suka hada a watan Agusta 2024 da kuma wadda akayi a watan Oktoba 2024.
Saidai yayin da wasu matasa suka yi maraba da wannan mataki wasu kuma sun nuna rashin gamsuwa da shi, sai dai kusan watanni uku da wannan furuci na shugaba Tinubu, ba a sake fitar da wata sanarwa ba kamar yadda wasu kungiyoyin matasa suka nuna bacin ransu.
Kungiyoyin sun hada da Arewa Youth Consultative Forum, Yoruba Youths Council, Ohanaeze Ndigbo Worldwide da Ijaw National Congress, sun zargi gwamnatin Tinubu da yin watsi da shirin.
Ministan ci gaban matasa, Mista Ayodele Olawande, ya ce wakilan matasan za su hallara a babban birnin tarayya Abuja, na tsawon mako guda bayan shafe makonni uku suna tattaunawa da matasa a matakin kananan hukumomi da jihohi.
“Za mu yi taron a farkon makon Fabrairu, Shi ya sa za a shafe kimanin makonni uku na wannan taron tare da al’umma,” in ji Olawande, wanda ya kara da cewa shugaba Bola Tinubu zai kaddamar da zababbun wakilai nan da tsakiyar watan Janairu.
