Gwamnatin Kano ta yi takaicin girke yan sanda a fadar Sarki Muhammadu Sanusi II
2 years ago 1 min read
Share:
Gwamnatin jihar Kano ta bayyana matukar damuwarta game da girke jami’an tsaro dauke da makamai a fadar Kofar Kudu ta Sarkin Kano, Muhammadu Sanusi II.
Gwamnatin ta ce lamarin ya haifar da tashin hankali da damuwa tsakanin mazauna Kano da kewaye.
Gwamnatin ta bayyana rashin jin dadinta ne a cikin wata sanarwa da kwamishinan yada labarai, Baba Halilu Dantiye, ya sa wa hannu.
Sanarwar ta ce gwamnati ce mai nauyin tabbatar da zaman lafiya, kwanciyar hankali, da kuma bin doka a fadin jihar.
“Muna Allah wadai da duk wani abu da zai lalata zaman lafiya ko kokarin tauye darajar masarautu, wadanda suke da muhimmanci wajen hadin kai da cigaban al’adu na al’ummarmu.”
Gwamnatin tace tana aiki tukuru don gano dalilan afkuwar lamarin, kuma ana aiki da hukumomi domin magance shi.
Gwamnatin jihar Kano ta bayyana kudirinta wajen kare hakki da jin daɗin al’ummarta da kuma tabbatar da ci gaba da zaman lafiya a cikin jihar.
