Gwamnati ta musanta bullar sabon nau’in cutar COVID-19 a Najeriya
2 years ago 1 min read
Share:
Ma’aikatar lafiya ta tarayya ta musanta bullar sabon nau’in cutar COVID-19 mai suna XEC a Najeriya.
Ma’aikatar, a cikin wata sanarwa da mataimakin darekta na sashen labarai da juldar jama’a, Mista Alaba Balogun, ya sanyawa hannu, wanda aka rabawa manema labarai a Abuja ranar Asabar, ta yi kira ga ‘yan Najeriya da su kwantar da hankalinsu kuma su yi amfani da hanyoyin kare kai da aka saba dasu.
Nau’in COVID-19 na XEC, wanda aka gano a Australiya kwanan nan, ya yadu zuwa kasashe 29.
Wannan ya haifar da damuwa game da yiwuwar tasirinsa a kan tsarin kula da lafiya na duniya.
Ma’aikatar ta jaddada cewa bincike ya nuna babu alamar wannan nau’in a cikin kasar nan.
Duk da haka, gwamnatin tarayya ta inganta asibitoci da dakunan gwaji da kuma wuraren kebe masu cutar domin basu kulawa ta musamman, sai kuma naurorin taimakawa numfashi wato ventilators.
Ma’aikatar ta kuma bayyana cewa rahotannin da ake yaɗawa a shafukan sada zumunta, ciki har da wata wasiƙa da aka yi wa kwanan wata 5 ga Disamba, 2024, wanda ke nuna cewa an gano XEC a cikin kasar, ba gaskiya bane.
