Gwamna Buni ya umarci hukumomi dasu tabbatar da bin dokokin hanya
2 years ago 1 min read
Share:
Gwamnan Jihar Yobe, Hon. Mai Mala Buni, ya umarci hukumomin kula da zirga-zirgar ababen hawa da su tabbatar da bin dokokin hanya sosai, musamman a wannan lokutan na shirin bikin Kirsimeti da sabuwar shekara.
Umurnin ya biyo bayan wani mummunan hatsarin mota da ya afku a kan babbar hanyar tarayya ta Bayari zuwa Geidam, wanda ya yi sanadin mutuwar mutane da dama.
A wata sanarwa da Daraktan Yada Labarai, Mamman Mohammed ya fitar, Gwamna Buni ya bayyana lamarin a matsayin babban rashi ga iyalai da jihar.
Gwamnan ya jajantawa iyalan wadanda suka rasu, yana mai addu’ar Allah ya jikan wadanda suka rasu, ya kuma baiwa ‘yan uwansu hakurin jure rashin.
Gwamna Buni ya baiwa hukumar kiyaye hadurra ta kasa (FRSC), da hukumar kula da zirga-zirgar ababen hawa ta jihar Yobe (YOROTA), da kuma sashen duba ababen hawa da su tabbatar da cewa kwararrun direbobi da motocin da suka cancanta ne kawai suke gudanar da ayyuka a titunan jihar.
“Dole ne kungiyoyin zirga-zirgar ababen hawa su hada kai don tabbatar da tsaro ta hanyar hana direbobi Yara, da ba su isa tuki ba, motocin da aka zuba wa kaya dayawa, da motocin da ba su dace ba yin amfani da hanyoyin,” in ji shi.
